Kumpulan Geguritan

WAYAHE MAPAG JAMAN KUNCARA

Pine Wiyatno

Sukawati,

Dawane lurung wektu tansah lumaku

Rongatus suwidak enem pecak wis keri ana mburimu.

Yuswa kang kebak maduning rasa lan paithing dhuhkita.

Simbah, bapak, aku lank owe, bisa ngitung, niteni lan crita,

Menawa obah mosike jaman manut ubenge cakra manggilingan,

Anatrane angen-angen lan kanyatan

Antarane mbiyen lan sakiki.

Gegeran lan ontran-ontran tan ana kendhate

Muga dadi rebuke katentreman

Dadi kaca benggalange kekadangan

Yen kabeh mau bakal dadi pepadhang kanggo dalane bebrayan agung.

Sanadyan lakumu kesandhung tawang,

Kabeh isih bisa nyawang lintang-lintang tinata ing awing-awang

Sawise kalimphut pedhut

Sawise sinambe angin mawut

Sukawati,

Lakumu saya adoh

Pecak ing tindak tanpa wilangan

Ala-becik, bener-lupt, eleng lan lali

Worsuh dadi siji

Mula mung siji dak jaluk,

Pasrah, sumarah ana ngarsanig gusti Allah.

Adohe wes sak lae-lae

Wes nglakoni apa wae

Wayahe tata-tata

Wayahe jaga-jaga

Mapag jaman kuncara kanggo ngregem gegayuhan.

Mumpung padhang rembulane

Mumphung jembar kalangane

Ayo surak……...surak…..hiyo……..

TANGISING WENGI

Dedek Witranto

Kidung kinanthi

Ngumandhang

Ngrasuk lakuning angin

Bocah bajang kelangan uped

Dammar nrambas wengi lumaku

Bumi iki

Wes dak pangku

Tak ruwat!

Eluh kang tulus lan suci

Rungakna jeriting bumi

Lumantar banyu

Segara mbudak nyempyok kahanan

Gangsinge angin

Mluntir wewangunan

Lelorone….

Mandegka…

Ngrusak tataning urip lan panguripan

Lelumban hawa nafsu adu sikut

Rayahan bumi kalungguhan nerak pagering kamanungsan

Eluhku terus tumetes dadyo rebuking katentreman

Tangising wengi

Tangising bumi pertiwi

NDARA KANCIL

S. Haryono

Punika carios ndara kancil bibar

Maling timunipun pak tani

Amargi kuwatos konangan naming mlajeng sipat kuping

Matanipun mboten ngemataken margi, sehingga mlebet wonten luwengan

“Anggonku mlayu sajake

Uwis ginaris pancen kudu tekan jurang kene

Ana apa kok yo ndadak nganggo, kesusu ta iki mau?

Cangkemmu bonyok timune ambyar

Wong yha padha-padha jatah mulis esuk

Karepku yha ben ra konangan tangga-tangga lan

Papas an karo boio anggone nang mesjid

Banjur timun sa akehe kaya ngene iki kanggo apa?

Ora ana tegese kabeh, sing baku aku kudu

Bisa menek mbuh piye caraku metu saka jogangan kene

Lho….ginanjar karahayon uripku iki

Kok ana wedhus matane milang-liming mrene

“Kang wedhus” padhos napa?

“Lho ndara kancil” kula badhe pados toya

Nanging kok katinggal asat

Lajeng wonten punapa ndara

Wayah tasih enjang ndodok wonten mriku?

WC lan kamar mandi nggriya punapa dereng dados?

“Nengga pak Bupati, bilih kula kadawuhan mendet nawala

Kamangka isine serat kapasrahan tugas

Kangge wedhus-wedhus ing dusun mriki ugi

Amargi ing sabenipun wedhus satunggal

Pikanthuk satunggal bagor suket gajah

Enjing punika kedhah sampun dipun dum

Dumugi kandhangipun

Yen ora kaleksanan, tegespun kula ora isa nyambut gawe

Napa sampean gelem ngewang’i?

Pungkasane carios wedhus tumu nenggani

Salebething jogangan, lajeng ndara kancil nyuwun ijin

Badhe mendhet suket gajah

Kanthi cara minggah gegeripun lan

Ancik-ancik ndasipun si wedhus

Tekanipun si kancil kaleksanan

Saged medal saking jogangan punika

Merdeka!

Sesampun wonten nginggil kalian ngos-ngosan

Kesah lan nilaraken jogangan kanthi

Titip weling dhateng si Wedhus

“kang wedhus, tetap semangat!”

LUH

Pelok TS

Kaca-kaca mripat iki

Ngrantes mandhes nyocok telenging ati

Ora krasa

Luh ndlewer liwat pipi

Tumiba jrambah nelesi lemah

Yen weruh kanca bungah-bungah mangkat sekolah

Nganggo sepatu banjur pamit bapak ibu lan simbah

Kaca-kaca mripat iki

Ngrantes mandhes nyocok telenging ati

Ora krasa

Luh ndlewer liwat pipi

Tumiba jrambah nelesi lemah

Wong tuaku ora bisa ngragati sekolah

Nganggur klonthang klanting ora adoh seka ngomah

Kaca-kaca mripat iki

Ngrantes mandhes nyocok telenging ati

Ora krasa

Luh ndlewer liwat pipi

Tumiba jrambah nelesi lemah

Meruhi jaman brubah langkah

Akeh bocah ora saba omah

Turu sak enggon-enggon waton bisa mlumah

Kaca-kaca mripat iki

Ngrantes mandhes nyocok telenging ati

Ora krasa

Luh ndlewer liwat pipi

Tumiba jrambah nelesi lemah

Polisi, Mentri, Bupati, DPR RI, padha koropsi

Ngguya-ngguyu ora dilebokke mbui

Kaca-kaca mripat iki

Ngrantes mandhes nyocok telenging ati

Ora krasa

Luh ndlewer liwat pipi

Tumiba jrambah nelesi lemah

Isaku mung ngemut driji

Pasrah marang Gusti

Kareben padha enggal eling lan diadili

SUNGKEMKU

Imam Khotib Utomo

Tumetes banyu

Dadi trenyuhe atiku

Tata tuturmu dadi pathuladanku

Ibu….!

Sangsaya suwe anggonku urip

Sangsaya eling mring pituturmu

Aku mung awujud gedibal

Ora bisa mujudake kekarepanmu kang suci tur edipeni

Tresnamu ndak catet ing pikirku

Ibu….!

Tresna kang milih pindha banyu

Ora ana enteke

Wiwit jabang bayi

Nagnti tekeng pati

Panjenengan tansah paring piweling kanggo aku

Tembing-tembung sig diparengke manis ngluwihi madu

Ibu….!

Nyuwun pangapunten…!

Aku ora bisa nyenengake panjenengan

Uripku mung saya nglaraake manah panjenengan

Ora bisa nuruti karsamu

Ibu….!

Lungaku ora merga lali

Ananging arep gayuh kamulyan

Adoh panggonku cedhak atiku

Ora bakal ilang ing pikirku

Pahlawan ing atiku

Ibu….!

Mugi pangeran paring keslametan marang ibu